Vanlalsailova chuan, "Block leh Unit hrang hranga kan tanrualna leh campaign thawmah kan khingpuite an zam tawh a, a bikin minority area lamah nasa takin hma kan sawn a, anmahni zawkin thahnem an ngai a, a tlem berah vote 1200 chuang hmuh kan inbeisei," a ti.

Sailova chuan, Mizoramah sorkarna chelhtu kan nih avangin tumahin opposition MLA neih an duh ka ring lo. Hun lo taka min kalsantu Lalrintluanga Sailo pawh khan ruling bial nih kha a duhthusam a ni a, a duhthusam tihhlawhtlin hi ZPM chauhin kan tum lova, bial mipuite pawhin tihhlawhtlin an tum ngei ka ring takzet a, ngaihtuahna fim tak pawh an put ka duh takzet a ni," a ti.

Campaign kick-off ah hian Prof. Lalnilawma leh Pu Lalnghinglova Hmar bakah Baryl Vanneihsangi ten thu an sawi bawk.

C. Lalnunnema, Vice President, ZPM leh Dampa Constituency by election campaign committee chairman chuan, "Min enchhin duh lo opposition party-ten enchhin sawrkar min ti a, hetihlai hian Lalduhoma kaihhruai chuan kalphung thar mipui sorkar dinin ram hmasawnna turin chak takin hma a la mek a ni. Min enchhin duh lova min vote lotuten min entawn mek a, kum 1 leh thla 10 chhunga ZPM hnathawh ropui tak takte campaign committee chuan a tlangpui mipuite chhiar theih turin kan siam a, kan intiam angte kan tihlawhtling chho mawlh mawlh mek a ni tiin pamphlet an siam chu a tlangzarh.

Vawiina Dampa Bial By Election Campaign Kick-off hi Zothansanga, Secretary, Mizoram People's Forum, Reiek chuan a kaihruai a, C.Lalsanglura, Adviser, ZPM General Headquarters chuan hunserh hmangin Campaign Committee Secretary Dr.C Lalrammawia chuan report a pe a, he hun hi party hruaitu emawzatin an hmanpui a ni.